من أهان ريما الرحباني ومن توّعدت بالشطف؟

عربي تريند_ مرة جديدة تضرب ريما الرحباني بعباراتها القاسية وانتقاداتها اللاذعة، حيث وجّهت رسالة عبر حسابها على فيسبوك إلى كل من ينتقدها أو يشتمها.

وسألت قائلة: “يا حلوين شو بدّكن فيه هالبروفايل؟ وشو مقعّدكن عليه ليل نهار؟ العمى أنا ما بواظب عليه قدّكن! شو في؟ شو صاير معكن؟ بفهم تكونوا حشّورين بس ما بفهم ليه بتصرّوا توسخولي بروفايلي؟ شه!”.

وأضافت ريما، ابنة الفنانة الكبيرة فيروز: “يعني بلا معلمية، ما أنا شي فوت عليه، رح إشطفو طبيعي! روحوا بعِبعُوا شبعتكن وين ما بدّكن! إشمعنى هون؟ ها؟ هلق صحيح أوقات إذا عندي وقت بتكتِك بهيك تعليقات لأن بتسلى بس مش دايما عندي وقت! سو، الشطف أحلى شي”.

وأوضحت ريما: “بفهم إنّو كتير ناس ما بيحبّوني.. وأكثر بعد بيكرهوني وأكثر بعد بيحسدوني.. وبفهم كمان إنّو كتار اللي بيسبّوني إشي بالمجلات إشي بالجرايد إشي على المحطات على أنواعا إشي على مواقع التواصل.. بعرف بعرف.. صحيح ما بتابع بس بعرف! وما بيهمّني تابع ولا بيعنيلي تابع. سبق وقلتا بكتب بوستي وبمشي على طول أو بشتغل شغلي وبمشي على طول ما بوقف عند ردّات الفعل لا المنيحة ولا العاطلة، بوقف فقط عند إحساسي وضميري وواجباتي والشي اللي مآمنة فيه”.

وتابعت: “اللي ما عم إفهمو، ليه في بعض الإخوان، رغم وسع الأرض والدني، ورغم وسع المواقع اللامحدودة، بيصرّوا إصراراً يجوا يغنّوا الغنية الحافظينا على بروفايلي! العمى صحيح شو عينن ضيقة! بدكن ومصرّين توصلولي حقدكن؟ والله حافظتو ومش فارقة معاي بدكن تسمّوني؟ ما بنسم! بضحك وماكسيموم بشطف بعرف ما رح تغيّروا عاداتكن! بس يا ريت أفهم شو معلّقكن ببروفايل بتكرهوه!”.

وختمت: “كلمتي بأهميّة أفعالي! لا بعترف بكونترا ولا بمال الكون كلّو كلمتي هيّي كرامتي شو لكَن.. بحكي الإشيا زي ما هيّي خاصة لماّ كون معباية، انو سكتنالو سكتنالو آخر شي هانني… آآآه يا أخي”.

ومن المعلوم أن علاقة ريما الرحباني بأولاد عمها منصور سيئة جداً وغالباً ما تدور حرب بيانات بينهم على خلفية أعمال الأخوين الرحباني وأغاني فيروز، وآخر توتّر بين الطرفين تمّ على خلفية مشاركة أسامة الرحباني في حفلة موسيقية في باريس تحت عنوان “متحدون من أجل لبنان” حيث إتهمته بتشويه الإرث الرحباني ومحاولة التسلّق على فيروز وعاصي ومحوهما.